El sventadon

by Giglio Padovan

Giglio Padovan

El sventadon

XIX secolo

Edission original:	Trieste vernacola, Antologia della poesia dialettale triestina, a cura de Giulio Piazza, Milano, Casa Editrice Risorgimento R. Caddeo & C., 1920
Fonte:	Indice:Trieste vernacola.djvu

Edission e fonte ▼

EL SVENTADON.

Quelo che d'una mosca fa un cavalo,
E magna e beve e parla a strangolon,^[1]
Che distinguer no sa bianco da zalo
E vol ficarse in tute le quistion;

Quelo che salta da la frasca al palo,
D'ogni storia facendo un zavagion,^[2]
Ch'ora ve spenze,^[3] ora ve pesta un calo
E ziga sempre e ga sempre rason;

Che cerca i soldi co 'l li ga in scarsela,
E puza^[4] i guanti sora 'l fogoler,
O va impizzar la pipa a la mastela;

Come xe vero 'l vin de sto bicier,
El lassarà un bel zorno la borela^[5]
Fra 'l petene e 'l bruschin^[6] del so barbier.

Dialetto istriano.

---

Note

1. a strangolon, in fretta, così da restare strangolato
2. zavagion, zabaglione, qui nel senso di miscuglio
3. ve spenze, vi spinge
4. puza, poggia
5. borela, boccia, palla da giocare, in questo senso, la testa.
6. bruschin, spazzola.