Beppe Gambetta

ZE	Quésta pàgina a l'é scrîta in zenéize, segóndo a grafîa ofiçiâ

Bèppe Ganbétta (Zêna, a-i 25 de Frevâ de l’ànno 1955) O l’é ’n conpoxitô e sunòu de chitâra zenéize.

O dîxe d’êse ’n sunòu de chitâra acùstica. Fra e sò pascioìn gh’é a mùxica folk e o flatpicking (in mòddo de sunâ a chitâra co-o pléttro). O l’é ’n conpoxitô, in insegnànte e ’n apascionòu studiôzo de mùxica e de struménti maxicâli.

Réixe

Da ’na sôla réixe, svilupâ cómme muxicànte italiàn inamoòu ségge da country music americâna e da mùxica bluegrass che di soìn da tæra dond’o l’é nasciûo, o Ganbétta o l’à gjòu pò-u móndo. E o l’é andæto ascì a-o de la da Cortìnn-a de Færo (URSS) Dòppo 12 CD, 4 DVD, 4 lìbbri didàtichi e colaboraçioìn con tànti muxicànti de nominâta internaçionâle, o Ganbétta o l’é conosciûo cómme un di inovatoî da chitâra.

Nòrd-América

O Ganbétta, ascì s’o vîve ancón inta sò Zéna, a-o mànco dôe vòtte l’ànno, o va into Nòrd-América. O l’à sunòu inti ciù inportànti festivàl inti Stâti Unîi e into Cànada cómme o Walnut Valley Festival a Winfield (Kansas), o Merlefest inta Carolìnn-a do Nòrd, o Kerrville Folk Festival into Texas e quélli a Winnipeg e Edmonton. O l’à pigiòu pàrte ascì a tànti spetàcoli radiofònichi comò-u All Things Considered e E-Town.

Performance (Prestaçioìn)

O Ganbétta o l’à travagiòu inta pelìcola “The Primal Twang” e o s’é exibîo in pòsti avoxæ comò-u Ryman Auditorium a Nashville (Tennessee) e o Metropolitan Museum of Art de Neviorc. Inta sò cariêra o l’à sunòu co-i Gréndi da mùxica folk comò-u David Grisman, o Doc Watson, o Norman Blake, o Gene Parsons, e o Béla Fleck, O s’exibìsce ascì regolarménte co-o Dan Crary e co-a Band Men of Steel: in vêo e pròpio “summit” internaçionâle de chitâra (Dan Crary, Tony McManus and Don Ross) dónde són raprezentæ e despæge schêue co-îna conplèssa reciprocitæ muxicâle.

Acoustic Night (Néutte acùstica)

Ancheu o Bèppe Ganbétta, con l’agiùtto de sò mogê, a sciâ Federîca Calvìn Prîna, o l’òrganìzza inta “sò” Zéna ’na revìsta de mùxica acùstica, l’ACOUSTIC NIGHT, arivâ a-a vintitreiêxima ediçión into 2023, inta quæ o Ganbétta o séunna co-i ciù avoxæ muxicànti conosciûi into sò andâ in gîo pò-u móndo da mùxica acùstica.

Àn sunòu a l’Acoustic Night: Kathy Mattea, Frank Vignola, Vinny Raniolo, Aoife O'Donovan, Rushad Eggleston, Mike Witcher, John Jorgenson, MIke Dowling, Radim Zenkl, Bruce Molsky, Bryan Sutton, Nick Forster, Peter Ostroushko, Marco Fadda, Patty Larkin, Mike Marshall, Darrell Scott, Tony McManus, Missy Raines, Brad Davis, Don Ross, Dan Crary, Filippo Gambetta, Ian Melrose, Michal Vavro, Maurizio Geri, Gene Parsons, Martino Coppo, Steve Kaufman, Franco Morone, Stephen Bennet, Rolf Lislevand, James Keelaghan, André Brunet, Eric Beaudry, John Jorgenson, Mike Dowling, Radim Zenkl, Matteo Leone, François-Félix Roy, Aysanabee.

Stîle e sound (són)

Con l’América into cheu e-e réixe into sô e inti oîvi do Mâ Mediterànio, o Ganbétta o riêsce a “asardâ” e spónde di doî Continénti, con creâ ’na “koiné” (afinitæ) muxicâle dónde Country e tradiçión lìgure, cansoìn de l’emigraçión e balâte popolâri, amandoìn e chitâre-àrpa no sôlo stàn bén insémme, benscì vàn ascì a interagî e intrésan in diàlogo muxicâle ch’o no conósce nisciùnn-a rìgida clascificaçión. Inta sò cariêra o l’à colaboròu e sunòu con avoxæ sunoéi de chitâra in sciâ scêna folk internaçionâle cómme o Tony McManus, o Doc Watson, o Gene Parsons, o Dan Ross, o Norman Blake e o Dan Crary.

A mùxica do Ganbétta a l’é caraterizâ da ìntime emoscioìn, da-a coæ de comunicaçión, da-a riçercatéssa inti toìn, da-a sobrietæ e da l’umorìsmo. ’Na mùxica ch’a no l’é sôlo ’n èrto, pûo livéllo d’ecelénsa ténica, ma ch’a mòstra ascì e sensaçioìn drénto a ’n ànimo ademoelòu ch’o no smétte d’esplorâ e inovâ ma con restâ into mæximo ténpo fermaménte ligòu a-a tradiçión.

Coixitæ

O Bèppe Ganbétta o véste in mòddo sénplice, de lóngo con vestî scûi, ma dónde no mànca mâi e sò scàrpe rósse.

O fìggio do Bèppe, o Féipo Ganbétta, o l’é lê ascì ’n muxicànte, sunòu d’òrganétto creatîvo, e conpoxitô de mùxica d’aotô e tradiçión irlandéize.

O l’é ’n avoxòu tifôzo dòrian

Atri progètti