Category: ijo ante

kulupu li tawa ma Tiana tan tenpo 2026-08-09 tawa tenpo 2026-08-16

~ rsamys ~ 1 Comment

mun li len ale e suno. mi wile e sina ale a! ❤️

The meetup is happening in Tiana from August 9 to August 16 There’s going to be a total eclipse. Everyone who can, please come! ❤️

  • https://mallonge.net/maelopa2026 All the information is in toki pona (with some alternatives being available in Esperanto) – if you have any comments or questions, if there’s something you don’t understand, please reach out!
  • We’re sharing a venue and the background orgnanisation with the Esperanto group TEJO for the IJK gathering. In most things, though, the 2 groups will stay separate
  • We need to make a program, ideas and things you could host are very welcome!

telo pi pona sijelo

~ rsamys ~ Leave a comment
jan sona li lukin e poki telo sona
sitelen ni li tan jan Sali, li kepeken nasin CC BY-SA

tenpo sike ni en tenpo sike pini wan la, ike li lon. sijelo pi jan mute li kama jaki. jan mute li moli. jan li wile ala e ni la ona li len e sinpin ona, li tawa ala kulupu, li telo e luka ona lon tenpo mute, li lon ala poka pi jan ante. ike ni li tan ijo pi lili mute mute a. ijo ni li ijo Kolona.

ijo Kolona li ken jaki e sijelo kepeken nasin seme? sijelo li poki mute pi lili mute. poki lili ni li wile e moku e ijo ante la ilo nena li lon selo pi poki lili. ilo nena li lukin e ni: ijo li kama la mi wile ala wile moku e ona? nena pona li lon ijo la, ilo nena li sona e ni: mi wile e ijo ni! taso ijo Kolona la nena li lon kin. nena li sama nena pona pi ilo nena. ni la ijo Kolona li ken kama lon insa pi poki lili. ona li insa la ike li kama tan ni: ijo Kolona li lawa e poki lili, li lawa e ni: poki lili li pali e ijo Kolona mute. ni li pakala e sijelo sina la sijelo sina li utala e ijo Kolona. ni la sijelo sina li pilin ike, li pana e ijo Kolona tawa jan ante, li ken moli.

taso jan li sona mute, li pali sona. ona li pali e telo. telo ni li sama ijo Kolona tawa utala pi sijelo sina, taso ona li pakala ala e sijelo, li kama ala mute sama ijo Kolona. ni la sijelo sina li sona utala e ijo Kolona, li ken utala wawa lon tenpo kama pi ijo Kolona. 

telo ni li awen e jan mute tan jaki Kolona la, ona o tawa jan mute. telo mute ni li lon tan kulupu esun ante mute, li ken kepeken nasin ante mute. ma mute la, telo mute li lon, taso nasin suli tu li lon la telo li kepeken nasin wan.

o utala e nena pi ijo Kolona

linja lili li lon insa pi ijo Kolona, li lawa e ale pi ijo Kolona. linja lili la ijo Kolona li ijo Kolona, li jo e nena lon selo, li wile kama mute mute, li kama e ijo Kolona mute mute tan insa pi poki lili sijelo. jan sona li lukin e ijo Kolona la ona li kama sona e ni: mama nena li lon seme lon linja lili? ni la jan sona li ken pana e linja lili pi mama nena taso a.

jan sona li wile e ni: ijo Kolona ala en nena taso pi ijo Kolona li lon insa sijelo sina. linja pi mama nena li lon insa pi poki sijelo lili la, poki li sona pali e nena. ni la, sijelo sina li ken kama sona e nena, li kama ala pakala.

sijelo sina li sona e nena pi ijo Kolona la, ona li ken utala wawa e ijo Kolona.

nasin nanpa wan: ante pi ijo lili ante

telo li ken kepeken nasin ni: 

ijo Kolona li ijo pi lili mute mute a, li ike. taso ijo ante pi lili mute mute a li lon, li ike ala tawa sijelo jan. ijo Ateno li ken ijo ni wan. jan sona li pana e mama nena pi ijo Kolona lon insa pi ijo Ateno.

ijo Ateno li tawa insa sijelo kin, taso ona li pakala ala e sijelo. ona li kepeken ilo nena ante lon poki lili sijelo. pali pi jan sona la, ona li pali li lawa e ni taso: poki lili pi sijelo sina li pali e nena pi ijo Kolona.

nasin nanpa tu: pali nena

telo li ken kin kepeken nasin ni:

sijelo sina la, poki lili li wile e moku. telo sijelo loje la, ilo lili li lon, li tawa e moku lili tawa poki lili la poki lili li ken moku e moku lili. ni la, jan sona li pali e ni: linja lili pi mama nena li lon insa sike lili. sike ni li sama moku tawa ilo moku pi telo sijelo loje, li sama moku tawa poki lili. 

ilo palisa ni li ken insa e telo lon insa luka jan
sitelen ni li tan jan Alonola, li kepeken nasin CC BY-SA

nasin ni li sin, li ken wawa kepeken mani lili.

o insa e telo ni

ike mute li tan ijo Kolona. telo pi ijo Kolona weka li lon jan mute mute la ike li ken kama lili, li ken kama weka. ni la, o toki tawa jan sona sina. sina ken la, o insa e telo ni lon sijelo sina. ni li pona tawa sina, li pona tawa kulupu, li pona tawa moli ala, li pona tawa jaki ala.

Continue reading “telo pi pona sijelo” →

lipu StoryWeaver la toki pona li lon

~ rsamys ~ Leave a comment

ken la sina wile lukin e lipu kepeken toki pona. taso lipu ni li mute lili. a, tenpo ni la ijo sin li lon!

ken la sina wile e lipu kepeken mani ala. taso lipu ni li lon seme? a, tenpo ni la ijo sin li lon!

ken la sina wile e lipu wan kepeken toki mute. taso sina sona ala e ni: ona li lon seme? a, ni la ijo sin li lon!

storyweaver.org.in

kepeken lipu ni la, jan li ken ante e lipu pi toki ante tawa lipu pi toki pona.

sina wile lukin e toki ni pi toki Inli la, o lukin e wan kama ni:
If you want to read a translation, go to the next page:

Pages: 1 2

ku

~ rsamys ~ Leave a comment

jan Sonja li pana e lipu sin a! ona li lipu ku.

ante suli

o pilin ike ala tan lipu sin ni. jan Sonja li wile ala ante e toki pona sina. 

ante lili

taso ante pi mute lili li lon. jan Sonja li pakala e nimi lon lipu pu la, ona li pona e nimi. ante la, ona li toki e nasin mute pi toki pona. sina sona e toki pona pi tenpo ni la ni li sin ala tawa sina. 

ante pi lili ala pi suli ala

nasin nanpa kijetesantakalu

jan Sonja li pana e nasin nanpa sin tan soweli nata. nimi nanpa ale li sama kijetesantakalu, taso wawa kalama ona li ante lon lili ona. sitelen la ona li awen sama. kijetesantakalu kijetesantakalu li sama luka tu. kijetesantakalu kijetesantakalu li sama luka luka luka tu tu. nasin nanpa ni li lon lipu musi, taso jan Sonja li toki e pona ona kin. pilin mi la, ni li musi taso, li ken ala suli e nasin nanpa. pilin mi la, jan Sonja li musi mute lon lipu ni. ona li toki e ni kin: ken la, nimi pi ma “Sawusi” (Saudi-Arabia) li ike ala tawa nimi ma lon toki pona. mi la, jan Sonja li wile awen e kon musi pi toki pona kepeken nasin musi ona. ona li sona wawa e toki pona.

toki luka

pu la, toki luka li lon. nimi ona li toki pona luka. taso jan Olipija li pali e toki luka ante. nimi ona li luka pona. luka pona li pona mute a la, jan Sonja li toki e pona ona.

nimi sin

lipu ku li toki e nimi sin mute e nimi mute pi sin ala. taso nimi ni li suli sama ala lon sona ale pi toki pona. jan pi mute lili li kepeken nimi mute pi pu ala. taso jan mute li kepeken nimi ku suli. nimi ni li namako (sama ala nimi “sin”), li kin (sama ala nimi “a”), li oko (sama ala nimi “lukin”), li kipisi, li leko, li monsuta, li tonsi, li jasima, li kijetesantakalu, li soko, li meso, li epiku, li kokosila, li lanpan, li n, li misikeke. sina wile la, sina ken kepeken nimi ale. toki pona la, nasin mute li lon. musi mute li lon. ku la, nimi ale mute luka luka luka tu li lon.

ante la, nimi sin ante li lon… taso jan ala li sona e sona ona. jan Sonja li wile kepeken ona lon tenpo kama sama nimi “pu“ anu nimi “ku”. nimi ni li ju, li lu, li nu, li su, li u. mi sona e ni: jan ante pi mute lili a li kepeken nimi lu, li kepeken nimi su lon tenpo pini. ni li ike ala ike? jan Sonja li toki e ni: ken la, nimi pi sama lukin li ken nimi tu, li ken kon tu. tenpo taso li ken pana e sona.

lipu mute a

lipu mute li lon insa pi lipu ni. suli la, lipu pu tu wan en lipu ante li sama mute pi lipu ku. ni li tan seme? nimi pi toki pona li awen mute ala a. taso toki Inli la, nimi mute li lon. jan pi kama sona li wile sona e nimi suli pi toki Inli, li sona wawa ala e sona pi toki pona la, mute suli a pi lipu ku li ken pana e pona. pona ni li tan jan Sonja anu seme? ala! jan mute pi toki pona li lukin e nimi Inli tan jan Sonja la, ona li pana e nimi pi toki pona. ni la, jan li ken sona e ni: jan mute pi toki pona li toki ala toki e nimi?

musi

toki ni ale la, sina ken pilin e ni: lipu ku li musi ala tawa pilin. taso musi li lon. jan Wakon Sasinali (Vacon Sartinari) li pana e sitelen musi pona suwi lon lipu. nimi musi li lon: tomo tawa la, jan wan li pana e nimi pi toki pona, taso nimi ni li nasa mute. nimi ni li Pingo. jan li weka e mani tan jan ante tawa jo ona lon tomo tawa telo la, jan wan li pana e nimi “jan kalamARR”. toki Kanse la, jan wan li pana e nimi “pan a a a”. nimi pi ale nanpa la, jan wan li pana e nimi “luka luka luka luka luka luka luka luka luka luka luka luka luka luka luka luka luka luka luka luka”. sina lukin e nimi lon lipu la, sina ken lukin e musi. musi ante li lon kin. jan Ne en jan Kapilu li pana e toki musi. soweli nata li pana e nasin nanpa kijetesantakalu.

lipu ni li pona tawa jan seme?

ken la, toki pona li toki suli tawa jan. ken la, jan li kama sona e toki pona, taso pali toki li mute tawa ona, li ken ala e nimi ale e kon ale. ken la, pu li lili ike tawa jan. ken la, jan li kute e jan ante pi toki pona, taso jan ante ni li kepeken nimi pi sona ona ala. ken la, jan li wile lukin e nasin pi jan ante. 

ni wan anu ni mute anu ni ale li lon tawa sina la, o ku! sina ku ala la, sina ken awen toki pona a.

lipu “toki musi pona”

~ rsamys ~ Leave a comment

toki musi pona li lipu tan jan Mimoku. toki en toki lili musi en sona li lon ona. ona li suli ala la, mi kepeken tenpo lili taso tawa ona. open toki ona en pini toki ona li kepeken toki tu wan: toki pona en toki Inli en toki Epelanto.

mi wile toki e toki musi pona tan seme? toki musi pona li kama la, pu li lon ala! ni li musi mute tawa mi. tan ni la, nasin pi toki pona li tan tenpo pini lon lipu ni. nasin ona pi nimi “pi” li ante tawa pu. sama la, lipu ni li sama lipu tenpo; toki mute li lon lipu ni, li musi. taso ona li sama lipu tenpo ala tan ni: toki mute ona li lili, li suwi musi taso, li tan jan wan taso.

mi la, toki musi pona li suwi mute, li sama lipu pi jan lili. ona li toki e soweli, e ilo tawa, e toki jan, e musi toki, e toki kulupu la, ni li sama lipu pi tomo sona pi jan lili tawa mi. toki pona la, ni li ike ala, li pona mute tawa jan sin pi toki pona, li pona tawa jan ale pi toki pona.
mi wile e ni: jan li lukin e toki musi pona la, jan li lukin e lipu tenpo kin, li wawa e toki pona ona tan lipu ni tu.

lipu tenpo nanpa wan

~ rsamys ~ 6 Comments
lipu tenpo nanpa akesi. akesi seli linja li lon sitelen pi lipu tenpo.
o lukin e ona!

mi pani e pali e pona tawa lipu sin. nimi pi lipu ni li “lipu tenpo”. ona li jo e pali mute tan jan mute. tenpo kama la, lipu nanpa tu li kama. ni li pini la, lipu nanpa tu wan en lipu nanpa ante li kama kin.

jan pali pi lipu ni en mi li wile e ni:

jan mute li lukin e lipu; jan li pilin pona tan ona; jan li pana e lipu tawa jan ante; jan li wile kama sona e toki pona. suli la, mi ale li wile e ni: kulupu ISO li toki e ni: toki pona li toki suli, li ken jo e nimi lili ilo pi kulupu ISO 639-2.

lipu tenpo li pona mute. o lukin e ona!

sina wile lukin e toki ni pi toki Inli la, o lukin e wan kama ni:
If you want to read a translation, go to the next page:

Pages: 1 2