Emma Thompson
Dame Emma Thompson | |
|---|---|
.jpg) Emma Thompson árið 2025. | |
| Upplýsingar | |
| Fædd | Emma Thompson 15. apríl 1959 Hammersmith, London, Englandi |
| Þjóðerni | Bresk |
| Ár virk | 1982– |
| Maki | Kenneth Branagh (g. 1989; sk. 1997) Greg Wise (g. 2003) |
| Börn | 2 |
| Óskarsverðlaun | |
| |
| Emmy-verðlaun | |
| Besta gestaleikkona í gamanþáttum fyrir Ellen (1998) | |
| Golden Globe-verðlaun | |
| |
| BAFTA-verðlaun | |
| |
Dame Emma Thompson (f. 15. apríl 1959) er bresk leikkona og handritshöfundur. Hún hefur verið virk í leiklist í rúma fjóra áratugi bæði í leiksýningum, kvikmyndum og sjónvarpi og hefur meðal annars unnið tvenn Óskarsverðlaun, þrenn BAFTA-verðlaun, tvenn Golden Globe-verðlaun og ein Primetime Emmy-verðlaun. Árið 2018 sæmdi Elísabet 2. Bretadrottning Thompson riddaranafnbót fyrir framlög hennar til leiklistar.[1]
Foreldrar Emmu Thompson eru leikararnir Eric Thompson og Phyllida Law. Hún gekk í Newnham-skóla við Cambridge-háskóla, var þar meðlimur í leikfélaginu Footlights og birtist í sketsaþáttunum Alfresco (1983–1984). Árið 1985 lék Thompson aðalhlutverkið í uppsetningu á söngleiknum Me and My Girl á West End, sem var tímamótaskref í ferli hennar. Árið 1987 varð Thompson kunn fyrir leik sinn í tveimur sjónvarpsþáttaröðum BBC, Tutti Frutti og Á ógnartímum, og vann sjónvarpsverðlaun BAFTA sem besta leikkonan fyrir frammistöðu sína í báðum þáttaröðunum. Snemma á tíunda áratugnum vann Thompson oft með þáverandi eiginmanni sínum, leikaranum og leikstjóranum Kenneth Branagh, í myndum á borð við Hinrik V. (1989), Örlagavefur (1991) og Ys og þys út af engu (1993).
Thompson vann bæði BAFTA-verðlaun og Óskarsverðlaun fyrir leik sinn í kvikmyndinni Hávarðsendi árið 1992.[2] Árið 1993 var Thompson tilnefnd til tvennra Óskarverðlauna, sem besta leikkonan og besta aukaleikkonan, fyrir leiki sína sem húsþerna í myndinni Dreggjar dagsins og sem lögfræðingur í Í nafni föðurins og varð þar með ein fárra leikara sem hafa verið tilnefndir í báðum verðlaunaflokkunum sama árið. Thompson bæði lék í og skrifaði handritið að myndinni Vonir og væntingar (1995) og hlaut fyrir það Óskarsverðlaunin fyrir besta handritið byggt á öðru verki. Hún varð þar með eina manneskjan í sögu Óskarsverðlaunana til að vinna verðlaun bæði sem leikari og handritshöfundur.[3] Thompson hefur einnig hlotið jákvæða dóma fyrir hlutverk sín í myndunum Í fánalitunum (1998), Ástin grípur alla (2003), Saving Mr. Banks (2013), Late Night (2019) og Good Luck to You, Leo Grande (2022).
Meðal annarra þekktra hlutverka Thompson má nefna leik hennar sem Trelawney prófessor í Harry Potter-myndunum (2004–2011), Nanny McPhee (2005) (sem hún skrifaði einnig), Skrýtnara en skáldskapur (2006), An Education (2009), Men in Black 3 (2012) og hliðarmyndin Men in Black: International (2019), Hin hugrakka (2012), Fríða og dýrið (2017), Cruella (2021) og Matthildur (2022). Í sjónvarpi hefur hún meðal annars birst í Óbuguð (2001), Englar í Ameríku (2003), The Song of Lunch (2010), Lér konungur (2018) og Years and Years (2019). Hún lék fröken Lovett í uppsetningu Lincoln-miðstöðvarinnar á söngleiknum Sweeney Todd eftir Stephen Sondheim árið 2014.
Thompson hefur einnig samið þrjár barnabækur um Pétur kanínu með leyfi frá útgáfufélagi Beatrix Potter.
Kvikmyndaskrá
[breyta | breyta frumkóða]Sem leikkona
[breyta | breyta frumkóða]Tenglar
[breyta | breyta frumkóða]- Þorsteinn Erlingsson (1. maí 1994). „Emma Thompson“. Vikan. bls. 62–65.
Tilvísanir
[breyta | breyta frumkóða]- ↑ „Emma Thompson á lista drottningar“. mbl.is. 9. júní 2018. Sótt 7. apríl 2026.
- ↑ „Er ekki lengur í skugga eiginmannsins“. Morgunblaðið. 4. apríl 1993. bls. 45.
- ↑ Máni Snær Þorláksson (21. febrúar 2023). „Hræðilegur hluti af starfinu“. Vísir. Sótt 7. apríl 2026.
- ↑ Eden, Richard (23. desember 2012). „Emma Thompson is kept waiting by John Ruskin film“. The Telegraph. London. Sótt 14 janúar 2013.
- ↑ Chitwood, Adam (5. desember 2018). „The Men in Black Reboot Is Titled Men in Black International“. Collider. Sótt 5. desember 2018.
