Trimarán é un barco multicasco que consta dun casco principal (vaka) e dous flotadores máis pequenos (amas) atados ó lado do casco principal con puntais laterais (akas). Este tipo de barco é principalmente empregado para a recreación e carreiras a vela.
Os primeiros trimaráns foron construídos polos polinesios hai case 4000 anos, e a meirande parte da terminoloxía relacionada con este tipo de embarcacións é herdada das linguas polinesias. Os barcos multicasco de vela (catamaráns e trimaráns) cobraron maior presenza a partir das décadas de 1960 e 1970. Os trimaráns modernos con fins recreativos están arraigados na tradición de construílos en casa como outros multicascos, aínda que na actualidade existe un número máis ou menos amplo de modelos comerciais.
